بسم الله الرحمن الرحيم
ماتعودت انزل موضوع مره وحده واخربها لكن هالمره جتني جرأه وقلت هي خاربه خاربه فا تساهلو معي بارك الله فيكم ولحد يدقق بالاخطاء
وانا اتقلب على السرير في محاولة للنوم للمره المليون طقتني ذكريات قديمه وضاق صدري منها
وقمت اطالع نفسي في المرايه واصفق عمري كفوف لعل وعسى اتأدب
طبعا انا انسان دايم اجيب العيد وفيني كمية فهاوه غير طبيعيه
مالكم بالطويلة
من ضمن المواقف المحرجه اذكر قبل كم سنه كنت جالس انا وخمسة من اخوياي نفطر في البوفية الي حولنا كبدة حاشي مع جبن وشوية شطه
المهم فيه رجال معنا منيب امون عليه مره كان خوي خويي وماشفته الا كم مره وبيني وبين سلام واخبار وعلوم فقط لاغير
المهم الرجال هو واخوانه ربي معطيهم بياض ناصع لدرجة انه لامر كأنه نجفه في حوش بيت وتحتها البزارين يلعبون كوره
المهم في عز الفطور والدق في الكبدة والجبن نصه في برطمي السفلي والشطه مكبوبه تحت الزرار
مر اخو الرجال الي منيب امون عليه الي هو ناصع البياض مر من قدامي عند البوفيه مدري من وين جا
انا في هذي اللحظه قمت اطالع الرجال وادقق اثره لابس فروه كان الجو بارد انا في هذي اللحظه طلعت كل الي بطني وقلت يوووووووه ياعيال بالله طالعو عرفتوه قالو من قلت هذا فلان ياخي الا بيصير سعودي يالللللللله يعنني لابس فروه الحين بيطلع سعودي
طبعا وانا اتكلم نسيت ان اخوه جالس جمبي
واتكلم لي نص ساعه وانا اشرشح ولا احد تكلم من العيال ولا حتى علق ولا غمز لي على الاقل
وانا اتكلم ومافيه شي ماقلته عاد اخر شي يوم سكت واطالع الي قدامي خويي يأشر بعينه يعني طالع يمين ترا اخوه جمبك ههههه
انا يوم التفت على الرجال ساكت ووجه محمر من كثر البياض ويفطر ولا قال شي
في هذي اللحظه جمدت اعصااابي ولاعرفت وش اقول وبنفس الوقت بغيت اقوم واطبع علبة الشطه في التنك الي جالسين قدامي لأنهم ماتكلمو الا اخر شي
التفت على الرجال والخمت ولاعرفت وش اقول اول ما حط عينه بعيني قلت ماشاء الله ياخي ما يشبه لك اخوك صراحه >>>>>>>>>>> امحق تصريفه
هو سكت وقال الا يشبه لي هههههههههههه والصدق انه نسخه منه بس انا تلعثمت ومسوي بصرف الموضوع المهم اني قمت وغسلت يدي بعد الفطور
ومن بعدها قسم بالله اني لاشفت الرجال تجيني ضيقه واحس اني حمار يوم اتكلم واصفق عمري شوي
وعجزت انسى السالفه مع الرجال ما تكلم وحبيب والله لكن عجزت انسى السالفه وللحين وانا افكر فيها وراح عليها وقت كثير
شطحه ثانيه قد مريت فيها وهي الكذب والبلا ان السالفه صارت مع ابوي
مره كنت جالس بالبيت المهم جاني الوالد الله يحفظه وقالي اسمع وانا ابوك ترا بعد ساعه وعليها بيجوني رجاجيل وابيك متواجد بالبيت وقل لأهلك يصلحون القهوه والشاهي وإلخ ....
المهم قلت ابشر وقالي هاه اياني واياك تطلع من البيت وتروح لأخوياك الدشير لاتتعدا البيت
عاد انا من النوع الي يجلس بالبيت لو اني منيب مواعد احد وماعندي احد لازم اطلع
يعني لاصار فيه عزيمه او جمعه انهار نفسيا وتجيني كئابه حتى لو عيال عمي بالبيت ومعي
المهم مالكم بالطويله الوالد قالي انا بطلع من البيت مشوار ساعه وبجي لاتطلع بيجون الرجال قلت ابشر
هو طلع وشغل يوم طليت وشفته راح قلت تدري ياولد دام انه مشواره ساعه اطلع خذ لك شمة هوا
وارجع قبل ما يجي
طلعت وانا ضامن انه مهوب راجع الحين والرجاجيل مهوب جاين الا بعد صلاة العشاء وكان باقي على العشاء شوي
المهم وقفت عند اشارة حول بيتنا طربان على اغنية ماجدة الرومي كلمات >>> جوك
ويرن الجوال واطالع اثره الوالد قلت في مخي شكله بيقولي قلهم يصلحون كذا بعد لاينسون لأن مستحيل يصير بالبيت مابعد اذن العشاء
هيمو : سم يبه
الوالد : وينك ؟
هيمو : انا بالبيت امر
الوالد : اقول دق اشاره يسار وعود للبيت لأنزل عليك بالعقال قدام خلق الله وانتبه لاتقطع الاشاره
هيمو : ابشر طال عمرك تك تك تك تك تك تك >>>> صوت اشارة السياره
ههههههههههههههههههههه
الحاصل ان الوالد صادف وصار جمبي عند الاشاره يوم طالعته بعيني يطالعني يحتريني اديور هههههههههههه
من بعدها لاقال الوالد بيجون رجال اتذكر نظرته يوم عند الاشاره والموقف الي صار
المواقف واجد ولو بقول مواقفي كلها خلص حبر منتدى خارج عن القانون>>> ظريف
ما يستفاد من كلامي هذا
1- ان العجله شينه
2-خلك صريح بأي رد يجيك ولاتحاول تصرف او تكذب او ماترد عشان ما تنقفط وتطيح بموقف تتمنى ان الارض بالعتك
كل منى له مواقف عطونا مواقفكم
اعذروني على اللخبطه واتمنى ان الموضوع خفيف عليكم
اعدأد/ هيمو
بقلممممممي
